Ministrja e Drejtësisë, Dhurata Hoxha, ka folur për përgjimet e publikuara nga Insajderi, përmes së cilave u dëshmua se si ish-shefi i grupit parlamentarë i PDK-së Adem Grabovci, brenda vetëm dy muajve kishte punësuar shumë të afërm e përkrahës partiak nëpër institucione dhe agjencione  të pavarura.

Por, për ministren Hoxha, kjo nuk është shumë problematike pasi sipas saj shumë nga këta persona nuk ishin punësuar në pozitat e përmendura në përgjime.

“Çdo gazetari hulumtuese që merret thellësisht me këtë rast do ta vërente se shumë prej këtyre personave që janë përfolur në këto përgjime nuk i kanë marrur ato pozita do të thotë nuk janë konkretizuar asnjëherë “

“Është në përgjegjësi e organeve kompetente të drejtësisë për të vlerësuar se a ka elemente të veprës penale apo jo në ato përgjime që janë dëgjuar”, ka thënë Hoxha.

Ajo përmes një interviste në Rubikon ka deklaruar se nuk është vetëm PDK-ja e vetmja parti që përmes telefonit që kanë vendosur të afërmit dhe përkrahësit partiak nëpër pozita publike.

“Por duhet të them se prapë se prapë duhet të kthehem në mentalitetin e shoqërisë kosovare, jo për ta shfajësuar dikë, por besoj se nuk është vetëm PDK- që i ka biseduar këto gjëra por të gjithë partitë edhe ato opozitare të cilat i menaxhojnë në ditët e sotme veprojnë njëjtë dhe ky është një mentalitet i shoqërisë tonë të kaluar ku funksionarët e lartë nga komunizmi vetëm me një telefonat i kanë vendosur apo zhvendosur  të cilët kanë qenë të afërt me ta nëpër pozita të caktuara”, tha Hoxha.