Zyra e presidentit të Malit të Zi, Jakov Millatoviq, ka akuzuar zëvendëskryeministrin Nik Gjeloshaj për dërgimin e kërcënimeve dhe mesazheve të papërshtatshme, pasi presidenti e ktheu për rishqyrtim Ligjin për tatimin mbi pasurinë e paluajtshme.
Kabineti i Millatoviqit ka kërkuar shkarkimin e Gjeloshajt dhe e ka njoftuar Policinë.
Sipas presidencës, kërcënimet lidhen me kontestet gjyqësore mes Komunës së Tuzit (drejtuar më parë nga Gjeloshaj) dhe kompanisë “Plantacionet e 13 Korrikut”, për taksa të paligjshme ndaj tokës bujqësore. Kompania ka fituar disa procese gjyqësore dhe ka ngritur kallëzim penal ndaj Gjeloshajt në Prokurorinë Speciale.
Gjeloshaj e ka mohuar akuzën dhe ka pretenduar se Millatoviq po përdor çështjen për të shmangur vëmendjen nga refuzimi i tij për të nënshkruar ligjin, duke e akuzuar presidentin për lidhje personale me ish-drejtues të kompanisë në fjalë.
Millatoviq, përmes rrjeteve sociale, ka deklaruar se nuk do t’i nënshtrohet presionit, ndërsa Gjeloshaj ka reaguar me tone të ashpra duke shkruar: “Do ta marrësh përgjigjen që meriton”.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
