Kushtetuta e Republikës së Serbisë njeh “faktin e padiskutueshëm juridik ndërkombëtar se Kosova është pjesë e Serbisë”, dhe të vetmit që janë ftuar të merren me përmbajtjen e aktit tonë më të lartë konstituiv janë qytetarët e Serbisë, ka thënë sot drejtori i të ashtuquajturës zyre serbe për Kosovën Petar Petkoviq.

“Në atë kuptim, Albin Kurti, si qytetar i Serbisë, ka autoritet të flasë për këtë, por vetëm si një person privat, sepse mendimi i tij vlen sa një votë e tij, dhe përmbajtja e Kushtetutës sonë sigurisht që nuk do të jetë objekt i çfarëdo bisedimi nën mbikëqyrjen e huaj”, ka thënë Petkoviq në një deklaratë.

 “Për dallim nga kushtetuta serbe, e cila respekton realitetin dhe është dokumenti më i lartë ligjor i një shteti të njohur ndërkombëtarisht, ajo që Kurti dhe bashkëmenditarët e tij e quajnë Kushtetuta e Kosovës është një akt i përkohshëm juridik, i cili duhet të ndryshohet urgjentisht, në mënyrë që të zbatohet gjithçka për të cilën Kosova është obliguar në dialogun e Brukselit”, vazhdon Petkoviq me deklaratën për konsum të brendshëm në Serbi./Insajderi.org.