Srdjan Radulovic, bashkëpronar i klubit të kick-box-it “Kosovka Mitrovica”, ka reaguar pas arrestimit të ortakut të tij, Milun Milenkovic apo “Lune”, i cili është pjesë e Mbrojtjes Civile serbe.

Radulovic me anë të një postimi në ‘Facebook’, e ka portretizuar mikun e tij si të pafajshëm, ndonëse i njëjti dyshohet për sulm ndaj zyrtarëve policorë të Policisë së Kosovës dhe pjesëtarëve të KFOR-it në veprimet e dhunshme të 29 majit në veri, shkruan Gazeta Insajderi.

“Sot në Mitrovicë të Kosovës është arrestuar miku dhe kolegu ynë Milun Milenkoviq, i cili ndoshta është fajtor për mbrojtjen e shtëpisë dhe familjes së tij. Padrejtësia nuk mbaron kurrë…”, ka shkruar ai, i cili më pas e ka fshirë postimin.

“Lune” është dërguar në stacionin e Policisë së Kosovës në Prishtinë pas arrestimit. /Insajderi.org/