Një foto e publikuar në rrjetet sociale e zv.kryeministres suedeze, po shpërndahet me shpejtësi. Politikania nordike nuk ka komentuar asgjë në imazh, por ai flet vetë; një parodi e gjetur kundër Donald Trump.

Fotoja e Isabella Lovin është interpretuar si një kundërpërgjigjje e gjetur dhe ironizuese ndaj Presidentit të Shteteve të Bashkuara, i cili postoi një të ngjashme duke firmosur një urdhër ekzekutiv që ndalonte abortin.

Në foton e Donald Trump, duket se politikania suedeze ka vënë re një detaj; në një problematikë që u përket grave, siç është aborti, Presidenti vendos në një rreth tërësisht burrëror, pasi në foton e publikuar prej kreut të Shtëpisë së Bardhë nuk ka asnjë femër.

Brenda pak orëve fotoja është shpërndarë me shpejtësi fillimisht në Facebook e më pas në pjesën më të madhe të rrjeteve sociale.

“Foto e mrekullueshme! Shpresoj të ketë mbërritur tek njeriu përtej Oqeanit. Bëje planetin madhështor sërish!”, ishin një pjesë e reagimeve të shumta për foton.