Zotimi i Adem Grabovcit për të punësuar një person të quajtur Gani Nikqi në Policinë e Kosovës – ashtu siç dëgjohet në publikimin e 17-të të Insajderit – duket të ketë dështuar. Policia e Kosovës njofton se Nikqi ka qenë kandidat për punësim porse “nuk ka arritur që të përmbushë kriteret e parapara, respektivisht të kaloj testet e nevojshme”.
Në hulumtimin e publikuar sot, Grabovci dëgjohet teksa deklarohet se ai ka autoritet mbi komandantin e Policisë së Kosovës. Këtë autoritet ai e shpreh gjatë bisedës me një kandidat, Gani Nikqi, të cilit i garanton se emrin e tij dhe të pesë tjerëve ia ka dhënë direkt drejtorit të Policisë së Kosovës, Shpend Maxhuni.
Nikqi e kishte telefonuar Grabovcin menjëherë pas intervistës për punë në Policinë e Kosovës, ndërsa Grabovci e kishte siguruar atë se pa marrë parasysh rezultatin puna do të ishte e kryer.
“Unë besoj që osht punë e kryme, se qashtu m’ka thanë, mirëpo e përcjell situatën, se drejtëpërdrejt me Shpendin kom bisedu”, dëgjohet tek thotë Grabovci.
Por, Policia e Kosovës ka reaguar ndaj artikullit duke thënë në Policinë e Kosovës është i punësuar vetëm një zyrtar policor me emrin Gani Nikqi, i cili është punësuar me 12.01.2004, e që nuk ka të bëjë fare me përgjimet e publikuara dhe me kohën e udhëheqjes apo menaxhimit të Drejtori të PK-së z. Shpend Maxhuni.
“Kjo edhe një herë ri-konfirmon faktin se proceduarat e aplikimit, konkurrimit dhe përzgjedhjes në Policinë e Kosovës kanë qenë strikte të bazuara në kritere dhe standarde të avancuara dhe në përputhshmëri të plotë me procedurat e parapara ligjore, që dëshmon realizimin e një procesi mjaft kredibil dhe të menaxhuar në mënyrë profesionale”, thuhet në njoftimin e Policisë./Insajderi.com
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
