Autoritetet polake bëjnë me dije se kanë arrestuar një shtetas rus, i cili akuzohet për veprën penale të spiunazhit.

Biznesmeni rus, i cili banon në Poloni, dyshohet se kishte mbledhur informacion në lidhje me gatishmërinë ushtarake të trupave polake dhe të NATO-s të stacionuara në vend.

Muajin e kaluar Polonia dëboi 45 diplomatë rusë të dyshuar se punonin për shërbimet e inteligjencës ruse, lëvizje kjo që solli reagimin e Kremlinit që iu kundërpërgjigj me të njëjtën monedhë.

Polonia ka qenë zëri kryesor në Bashkimin Evropian duke kërkuar sanksione më të ashpra kundër Rusisë për pushtimin e saj në Ukrainë.

Në një rast tjetër, dy shtetas bjellorusë të dyshuar për spiunazh u arrestuan në Poloni javën e kaluar. Ata dyshohet se ishin përfshirë në përpjekjet për të identifikuar objektet strategjike të mbrojtjes në vend.