Pas takimit të dy delegacioneve, në Presidencë, kreu i shtetit Bujar Nishani me homologun e tij kosovar, Hashim Thaçin zhvilluan një konferencë të përbashkët për shtyp, ku fokusi ishte në marrëdhëniet dypalëshe mes vendeve.

Në fjalën e tij, kreu i Shtetit shqiptar theksoi rëndësinë e bashkëpunimit mes dy vendeve tona, duke shtuar se Shqipëria do të vijojë mbështetjen e Kosovës në të gjitha proceset integruese.

“Në takimet që patëm ne përcollëm me emocion të veçantë gjithçka që Shqipëria dhe Kosova kanë arritur në përpjekjet e vazhduara në rrugëtimin e gjatë drejt integrimit. Në axhendë e vizitës, në përbërje të dy delegacioneve janë përfshirë edhe ministrat ë dy qeverive tona, çka e bën axhendën e bisedimeve më konkrete dhe impenjative. Përfshirja e ministrave të Bujqësisë, dhe Infrastrukturës, sidomos, tregon për rëndësinë e bashkëpunimit mes dy vendeve tona në këto fusha, si dhe impkatin e këtyre sektorëve3 në zhvillimin e vendeve tona. Me rëndësi janë dhe takimet e përbashkëta të dy qeverive tona”, tha Nishani, i cili ndër të tjerra vuri theksin edhe te dialogu mes Kosovës dhe Serbisë, që sipas tij ka një rëndësi të madhe jo vetëm për dy vendet por edhe mbarë rajonin.  “Kam besim të plotë se Shqipëria do të jetë zëri shtesë i Kosovës. Ne jemi në rrugë të mbarë dhe do të plotësojmë njëri tjetrin në rrugën tonë euroatlantike”, tha Thaçi.

Pas takimit me Presidentin Nishani, në orën 11:00, Presidenti Thaçi do të pritet nga Kryeministri i Shqipërisë, Edi Rama, kurse në orën 13:30, do të takohet edhe me Kryetarin e Kuvendit të Shqipërisë, Ilir Meta. Pas takimeve me krerët e shtetit, Presidenti Thaçi do të vizitojë familjen e shkrimtarit Dritero Agolli.

Ndërsa, në orën 16:30, Presidenti Thaçi do të takohet edhe me kreun e PD-së Lulzim Basha. Nesër në orën 09:00, presidenti Thaçi do të vendosë kurorë lulesh në monumentin “Nëna Shqipëri”. Ndërsa, në orën 09:30, në Bashkinë e Tiranës do të takohet me kryebashkiakun Erion Velijaj.

Pas këtij takimi, para se të niset për në Bashkinë e Shkodrës, Presidenti Thaçi do të vendosë, gjithashtu, kurorë lulesh edhe te shtatorja e Adem Jasharit në Tiranë. Ndërsa, në mesditë, rreth orës 13:00, në Bushat të Shkodrës, Presidenti Thaçi do të vizitojë futbollistët e Kombëtares së Kosovës, të cilët po bëjnë përgatitjet e fundit për ndeshjen me Kroacinë.