Presidenti i Kosovës, Hashim Thaçi, është duke qëndruar për vizitë zyrtare në Panama.

Presidenca e Kosovës njofton se ai do të marrë pjesë në inaugurimin e kanalit të Panamasë, që “është rruga e dytë më e madhe ujore në botë”.

Ai do të ketë takime bilaterale ndër të tjera edhe me Presidentin e Panamasë, Juan Carlos Varela, me Presidentin e Kostarikës, Luis Guillermo Solís, si dhe me Sekretarin e Përgjithshëm të Parlamentit Latino-Amerikan me seli në Panama, Elias Castillo.

Njoftimi i presidencës së Kosovës thotë se Thaçi do të takohet edhe me disa përfaqësues të shteteve që ende nuk e kanë njohur pavarësinë e Kosovës.