Presidenti i Republikës së Kosovës, Hashim Thaçi, ka thënë se lidershipi i Kosovës ka instaluar politikë bashkëpunimi me drejtësinë ndërkombëtare, duke e konfirmuar gatishmërinë për t’iu përgjigjur Gjykatës Speciale.

Sa i përket provokimeve të Serbisë, ai ka deklaruar se shtuar se ajo do të vazhdojë të sillet në këtë mënyrë derisa ta njoh pavarësinë e Republikës së Kosovës dhe të heqë dorë nga politika e vet hegjemoniste dhe nacionaliste.

Presidenti Thaçi ka thënë se vendimi për ndaljen e trenit propagandues nga Serbia ka qenë, siç ka thënë ai, vendim sovran i autoriteteve përgjegjëse kosovare, përderisa autoritetet ndërkombëtare kanë qenë të njoftuara më pas për vendimin e ndalimit të hyrjes së këtij treni.

Ish-udhëheqësi politik i UÇK-së gjatë kësaj interviste për “Zërin” ka folur edhe për Gjykatën Speciale, e cila tashmë edhe zyrtarisht ka nisur punën.

I pyetur se a do t’i përgjigjeni Gjykatës Speciale nëse do të ngrejë aktakuzë ndaj tij, si njëri nga drejtuesit e UÇK-së, Thaçi ka thënë se lidershipi i Kosovës ka instaluar praktikë të bashkëpunimit me drejtësinë ndërkombëtare.