Presidentja e Kosovës, Vjosa Osmani, ka pritur sot në një takim ambasadorin e Gjermanisë në Kosovë, Jorn Rohde.

Në këtë takim, u diskutua për zhvillimet e fundit në vend, përfshirë çështjen e hapjes së Urës së Ibrit.

Sipas njoftimit të Presidencës së Kosovës, Presidentja Osmani theksoi rëndësinë e zbatimit të planit për hapjen e urës nëpërmjet konsultimeve dhe koordinimit të ngushtë midis institucioneve të Kosovës dhe partnerëve të sigurisë.

Ajo theksoi se hapja e urës është e rëndësishme për të gjithë qytetarët, pa marrë parasysh etninë.

“Presidentja Osmani ka ripotencuar rëndësinë që plani i zbatimit për hapjen e urës të bëhet në konsultim e koordinim midis institucioneve tona dhe partnerëve tanë të sigurisë, dhe se hapja e saj është në interes të të gjithë qytetarëve, pa dallim etnie”.

“Në takim u diskutua edhe për zhvillime që ndërlidhen me Procesin te Berlinit, me ç’rast, Presidentja Osmani përsëriti mbështetjen e saj të plotë për marrëveshjet e dalura nga ky proces”, thuhet tutje në njoftim.