Ai ka bërë bujë në lajme duke shitur makarona në rrugët e Los Anxhelosit, ka prodhuar disa filma të shkurtër dhe ka rrëmbyer zemrat e miliona shikuesve teksa hyri në versionin italian të “Strictly Come Dancing”.

Tani Princi Emanuele Filiberto i Savojës, nipi 52-vjeçar i mbretit të fundit italian, ka bashkuar forcat me shtatë familje të tjera mbretërore në zhvillimin e një video-loje të re që do të ndajë trashëgiminë e tyre me një brez të ri që nuk ka dëgjuar kurrë për ta.

Loja, e cila titullohet “The RoyaLand”, po zhvillohet me trashëgimtarë mbretërorë të rrëzuar nga Shqipëria, Bullgaria, Franca, Jugosllavia, familja ruse Romanov dhe dinastia gjermane Mecklenburg, si dhe monarkët në pushtet të Lesotos në Afrikën Jugore.

“Ideja ime ishte të krijoja një lojë që mund të kombinonte joshjen e familjes mbretërore dhe emocionin e lojërave, duke përfshirë edhe familje të tjera mbretërore”, tha Princi Emanuele Filiberto për “The Telegraph” në një intervistë ekskluzive.

“Unë mendoj se është një situatë fituese për të dy lojtarët dhe për mbretërorët”, u shpreh ai.

Princi ende nuk i është afruar familjes mbretërore britanike, por tha se e kishte diskutuar propozimin me Princin Albert të Monakos, ku Emanuele Filiberto jeton me familjen e tij.

E mbështetur nga Inteligjenca Artificiale, videoloja po prodhohet në bashkëpunim me “Neosperience” me bazë në Milano dhe pritet të dalë në treg në fund të vitit të ardhshëm.

Materiali promovues i lojës përfshin një avatar të princit dhe i fton lojtarët të ndërveprojnë me familjet mbretërore në një “përvojë bashkëpunuese” ku ata luftojnë me rivalët e tyre për epërsi për të forcuar mbretëritë e tyre virtuale.

“Nuk është vetëm një lojë komplekse ku lojtarët duhet të zotërojnë tokën e tyre, por të rrisin fuqinë, pasurinë dhe territorin e tyre, dhe gjithashtu (të kalojnë) hierarkinë e fisnikërisë për t’u bërë mbreti ose mbretëresha e “RoyaLand” dhe për të mbajtur këtë titull”, tha princi pa asnjë lloj ironie.

Princesha Victoria, një qytetare e zakonshme italiane e cila u martua me Dukën e Madh George nga familja Romanov e Rusisë, e cila është gjithashtu një kushëri e Emanuele Filiberto, e përshkroi videolojën si “të teknologjisë së fundit”.

“Është një mënyrë e re për t’iu qasur historisë,” tha princesha për The Telegraph përmes telefonit. “Brezi i ri shpenzon shumë nga koha e tij në mediat sociale dhe videolojërat mund të jenë mjaft të cekëta. Por kjo do të jetë për të mësuar dhe do të jetë argëtuese”, shtoi ajo.

I lindur në Gjenevë, Emanuele Filiberto me pamje djaloshare u rrit në mërgim dhe nuk i ka fshehur sfidat e përcaktimit të rolit të tij që kur monarkia u refuzua nga italianët në një referendum mbarëkombëtar në 1946.

Pasi u lejua të hynte në Itali, pas përmbysjes së një ndalimi kushtetues, princi u bë një emër i njohur me fitoren e tij në Dancing with the Stars me vlerësimin më të lartë të Italisë. Ai ka folur edhe më parë për dëshirën e tij për t’u futur në politikë, duke aspiruar të bëhet kryeministër.

Por ai është i bindur se “RoyaLand” nuk ka asnjë lidhje me legjitimimin e emrit të Savojës ose me avancimin e ndonjë aspirate për të rivendosur monarkinë.

“Nuk është një lojë që do të më rikthejë”, tha ai. “Ka të bëjë me përpjekjen për të përcjellë një histori, një kulturë dhe vlera tek një brez i ri.”