Kryeqyteti i Kosovës, Prishtina sot është stërmbushur nga mbeturinat. Kjo për shkak se kompania e kontraktuar për pastrimin qytetit ka ndërprerë punën si pasojë e mos pagesës së borxhit nga Komuna e Prishtinës, shkruan Insajderi.
Ndërkohë i pari i qytetit, Përparim Rama nuk ka turp. Ai madje ka njoftuar se sot do të takohet me grupin e famshëm botëror “Gipsy Kings”, shkruan Insajderi.
Duke lënë anash këtë gjendje, Rama injoron tërësisht problemin e berllogut në kryeqytet.
Mbeturina në çdo cep
Çdo cep i Prishtinës, ku janë të vendosura kontejnerët është stërmbushur nga mbeturina.
Pamjet janë jashtëzakonisht të shëmtuara. Mbeturinat janë shpërndarë edhe në rrugë pasi që kontejnerët janë mbushur.
Njoftimi i “Pastrimit” për ndërprerje të punës
Kompania Rajonale e Mbeturinave “Pastrimi SH.A.” ka njoftuar se është e detyruar të ndërpresë ofrimin e shërbimit të grumbullimit të mbeturinave në territorin e Komunës së Prishtinës.
Në një njoftim zyrtar, KRM-ja deklaron se kjo po bëhet për shkak të mos pagesës së borxhit nga Komuna e Prishtinës, borxh ky që kap vlerën e 2.7 milionë eurove.
“Për më shumë se pesë muaj, Komuna nuk ka përmbushur obligimet financiare ndaj kompanisë, pavarësisht kërkesave tona të vazhdueshme dhe paralajmërimeve të përsëritura. Kjo situatë e ka bërë të pamundur mbulimin e kostove operative dhe vazhdimin e normal të ofrimit të shërbimeve” thuhet në njoftimin e KRM “Pastrimi”.
Kompania i ka bërë thirrje Komunës së Prishtinës që të veprojë urgjentisht në shlyerjen e menjëhershme të detyrimeve dhe të rivendosë bashkëpunimin institucional në funksion të garantimit të shërbimeve bazike për qytetarët e kryeqytetit.
Gjendja e qytetit:
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
