Gënjeshtra është një fazë normale e zhvillimit për shumicën e fëmijëve. Fëmijët e vegjël shpesh gënjejnë në përpjekje për të zgjidhur një problem.

Sado e padëmshme që mund të duket, prindërit duhet të jenë të vetëdijshëm për këtë. Gënjeshtrat përdoren për të shmangur pasojat dhe për t’u përballur me to.

Detyra e prindërve është t’i mësojnë fëmijët se si t’i zgjidhin problemet në një mënyrë më konstruktive.

Për të shmangur problemet

Ndoshta fëmija ka thyer një rregull ose nuk ka bërë diçka që duhej të bënte. Nëse fëmija nuk ka rrugëdalje tjetër, në vend që të vuajë pasojat, gënjen për të shmangur problemet. Ndonjëherë është e vetmja mënyrë që ai mund të zgjidhë një problem, dhe ndërsa gënjeshtra është e gabuar, është një aftësi mbijetese.

Për të fshehur një pjesë të caktuar të jetës së tyre nga prindërit e tyre

Fëmijët gënjejnë kur mendojnë se prindërit e tyre janë shumë të rreptë dhe zgjedhin të mos i dëgjojnë. Për shembull, ti je prind i një vajze 16-vjeçare të cilës e ndalon të grimohet, por e bëjnë të gjitha shoqet e saj, ndaj ajo vendos ta bëjë dhe përpiqet ta fshehë nga ty.

Për të krijuar një imazh të caktuar për veten

Fëmijët do të përdorin gënjeshtra për të krijuar një imazh për veten e tyre, edhe nëse ai imazh është i rremë. Mund të përdoret për t’u bërë përshtypje bashkëmoshatarëve ose si përgjigje ndaj presionit mjedisor. Kjo nuk është e pazakontë, në fund të fundit, ne të gjithë njohim të rritur që bëjnë të njëjtën gjë.

Për të tërhequr vëmendjen

Kur një fëmijë është i vogël, gënjeshtrat janë të vogla. Atëherë një sjellje e tillë mund të jetë vetëm mënyra e tij për të tërhequr vëmendjen. Fëmijët më të vegjël gjithashtu krijojnë histori gjatë lojës me imagjinatë. Në këtë rast, ata zhvillojnë imagjinatën e tyre dhe përpiqen të kuptojnë botën përreth tyre.

Pra, kur një fëmijë i vogël thotë “Sapo pashë Babadimrin të fluturonte pranë dritares sime”, kjo është shumë e ndryshme nga një fëmijë më i madh që thotë “Unë i bëra detyrat e shtëpisë” dhe nuk i bëri.

Që të mos lëndojnë askënd

Fëmijët gënjejnë për të mos lënduar ndjenjat e njerëzve të tjerë. Ata ende nuk dinë të thonë diçka në një mënyrë më të bukur, kështu që janë më rehat duke gënjyer. Kjo lloj gënjeshtër është hapi i parë për të mësuar se si t’i tregosh dikujt më me kujdes.

Përqendrohuni në gënjeshtrat më serioze
Vlerësimi i seriozitetit të gënjeshtrës varet nga ju. Por nëse vëreni se një fëmijë po gënjen për diçka të rrezikshme, të paligjshme ose të pasigurt, duhet adresuar.

Nëse është sjellje e rrezikshme në shkollë, sjellje seksuale, drogë ose aktivitete të tjera të dëmshme, mund t’ju duhet të kërkoni ndihmë profesionale.

Zgjidhni betejat tuaja. Ju e njihni dhe e doni më së miri fëmijën tuaj, por kjo nuk do të thotë që ju duhet të mbuloni sjelljen e tij të keqe ose të rrezikshme. Përqendrohuni në atë që është e rëndësishme.