Prokuroria Themelore në Prishtinë ka nisur hetimet lidhur me vdekjen tragjike të dy fëmijëve në Prishtinë, të cilët humbën jetën pasi ranë në një gropë të enjten në lagjen Kolovica.

Lajmin për nisjen e hetimeve e ka konfirmuar Liridona Kozmaqi-Hajdaraj, zëdhënëse në prokurori, e cila i ka thënë Insajderit se “prokurori kujdestar nga Prokuroria Themelore në Prishtinë, ka dhënë urdhër për obduksionin e fëmijëve dhe janë ndërmarrë edhe veprime të tjera hetimore të domosdoshme me qëllim të zgjidhjes së këtij rasti kritik”.

Të enjten pasdite, një djalë 11-vjeçar dhe motra e tij 13-vjeçe janë mbytur në një gropë me ujë, për të cilën banorët thonë se kanë kërkuar disa here nga autoritetet që të mbulojnë meqë ka shkaktuar rrezik për banorët.

Pas tragjedisë, drejtori i Inspeksionit në Komunën e Prishtinës, Xhelal Sveçla, ka dhënë dorëheqje, duke thënë se “ndjenë përgjegjësi njerëzore” por jo edhe ligjore.

Në anën tjetër, kryetari i Prishtinës, Shpend Ahmeti, ka thënë se tragjedia ka ndodhur në një pronë private ku me vite të tëra kompani janë furnizuar me material ndërtimor.

Ai ka qëndruar sot tek familja e fëmijëve për të shprehur ngushëllime.

Rreth dy javë më parë, një fëmijë në Prizren humbi jetën si pasojë e shembjes së një muri të një shtëpie të vjetër, për të cilën po ashtu kishte pasur paralëjmërim më herët për rrezikun që mund të shkaktojë.

Edhe në Prizren prokuroria ka njoftuar se ka nisur hetimet lidhur me rastin, më konkretisht, për të parë nëse ka pasur neglizhencë të autoriteteve lidhur me atë rast./Insajderi.com

IN Promo Marketing

Kompleksi JONI – Jetë e qetë në zemër të “Prishtinës së Re”

VIPA sjell risi në treg: MAXI tashmë i disponueshëm me dy shije të reja

KESCO prezanton oferta të reja për bizneset në tregun e hapur