Ftesa e presidentit Thaçi ndaj kryeprokurorit Lumezi për t’i zbardhur vrasjet, në veçanti ato të pasluftës, po shihet si hipokrizi. Akterë politikë thonë se deklarata e presidentit është nxitur nga procesi i Gjykatës Speciale. Madje në LDK thonë se vetë Thaçi është përgjegjësi për krimet e pasluftës.

Ata thonë se një veprim të tillë presidenti Thaçi e ka bërë vetëm për qëllime personale, që ta shfajësojë veten dhe t’i ikë sadopak Gjykatës Speciale.

Anëtarë të LDK-së thonë se krimet e pasluftës dyshohet haptas t’i ketë kryer ShIK-u, që në atë kohë udhëhiqej nga i pari i PDK-së, Kadri Veseli, shkruan Zëri.

Në anën tjetër, njohësit e Kodit Penal kanë thënë se dosjet e vrasjeve, në veçanti të atyre të pasluftës, duhet të hapen sa më shpejt. Ndërkaq, hulumtuesit dhe njohësit e drejtësisë thonë se kryeprokurori nuk duhet assesi të pranojë këshilla se kë duhet hetuar e kë jo, qoftë ai edhe presidenti.