Prokuroria Speciale e Kosovës ka ngritur aktakuzë sot në Gjykatën Themelore të Gjilanit ndaj një personi me iniciale V.H, i cili dyshohet se ka kryer veprën penale “organizimi dhe pjesëmarrja në grup terrorist”.

Sipas aktakuzës, i pandehuri V.H i është bashkuar organizatës terroriste të quajtur “ISIS” nga fundi i muajit qershor të vitit 2014 e deri në fund të dhjetorit të vitit 2015.

“I pandehuri duke shfrytëzuar rrugën ajrore përmes Aeroportit Ndërkombëtar të Prishtinës ka arritur në Turqi e pastaj nga aty në mënyrë ilegale ka kaluar kufirin për në Sirisë, ku dhe është bërë pjesë e organizatës terroriste ISIS, duke marre pjesë në veprimtarinë e grupit terrorist të organizatës së lartëcekur në forma të ndryshme”, njofton prokuroria përmes një komunikate për media.

Aktakuza është ngritur nga një prokuror vendor i Prokurorisë Speciale të Republikës së Kosovës./Insajderi.com