Në Krushevc të Serbisë në mëngjesin e sotëm, një autobus me udhëtarë kosovarë, është sulmuar nga persona të panjohur.

Autobusi i ka takuar kompanisë “Bici-Com” dhe pronari i kësaj kompanie ka treguar për Klan Kosovën se automjeti transportues po përshkonte linjën Prishtinë-Vjenë dhe jo anasjelltas, siç gabimisht është raportuar në disa media në Kosovë.

Nga ky incident që ka ndodhur, nuk është raportuar për të lënduar përveç dëmeve materiale.

Pronari i kompanisë së autobusëve, Behxhet Bici, ka thënë për Klan Kosoven “se autobusi është përcjellur nga dy vetura, njëra e vogël dhe një kombi. Personat në automjete i kanë raportuar njëri-tjetrit për lëvizjet e autobusit”.

“Në momentin që autobusi ka hyrë në kthesë është goditur me një shishe dhe si pasojë është thyer xhami i parë i autobusit. Fatmirësisht shoferi nuk e ka lëshuar rrugën kryesore për ta humbur drejtimin, ndërsa në autobus kishe 25-26 udhëtarë”, ka thënë Bici.

“Autobusi po qëndron në Serbi, për të mos e ndalë rrugën aty ka arritur një tjetër nga Kosova për t’i dërguar udhëtarët në Austri.

Bici tha se ky nuk është rasti i parë që autobusët e kësaj kompanie janë sulmuar në Serbi, sepse “para 10 ditësh në të njëjtin vend vetëm 200 metra më larg është sulmuar nga mbrapa dhe i është thyer xhami, por nuk e kem lajmëruar në media me pretendimin se nuk do të ndodhte më”.

“Nesër rreth orës 10-11 pritet ta marr edhe raportin nga policia, sepse sot nuk e kemi marrë me arsyetimin se është e diel dhe janë në pushim” tha Blici për Klan Kosovën.

Për këtë rast ka reaguar edhe ministri i Punëve të Jashtme, Enver Hoxhaj.

Ai ka shkruar në llogarinë e tij në Twitter se këto raste janë duke u shpeshtuar dhe askush s’po ndëshkohet.

”I dënoj fuqishëm sulmet vandale ndaj qytetarëve të Kosovës që udhëtojnë në Serbi. Këto sulme janë duke u bërë sistematike dhe askush nuk po ndëshkohet”, është shprehur Hoxhaj në reagimin e tij në rrjetin social Twitter.