Kryetari i Kuvendit të Azerbajxhanit, Ogtay Asadov të hënën u takua me një delegacion serb të kryesuar nga ministri i Punëve të Brendshme të Serbisë, Nebojsha Stefanoviq.

Asadov tha se Azerbajxhani ka treguar gjithmonë përkushtim për normat dhe parimet e së drejtës ndërkombëtare, “duke qëndruar praktikisht kundër separatizmit, ashtu siç ndodhi në Kosovë.”

“Azerbajxhani ishte i pari që tërhoqi forcat e saj paqeruajtëse nga Kosova pas ngjarjeve që kanë ndodhur në këtë rajon”, tha Asadov, shkruan agjencia e lajmeve APA nga Azerbajxhani.

Ai gjithashtu theksoi rëndësinë e Serbisë që të mbështes qëndrimin e Azerbajxhanit në konfliktin me Armeninë rreth rajonit të Nagornos dhe Karabakut.

Stefanoviq theksoi se vendi i tij mbështet integritetin territorial Azerbajxhanit në zgjidhjen e konfliktit. /Insajderi.com