Nuk mundi që t’i ndalë që të ia hetonin ministrat, e të ia arrestonin njerëzit e rrethit të ngushtë. Por, Kryeministri Albin Kurti, partia e të cilit ka edhe shumicën në Kuvendin e Kosovës nuk ua ka aprovuar buxhetin Këshillit Prokurorial që të shtoi numrin e prokurorëve e bashkëpunëtorëve për ta. Për këtë të premten publikisht është ankuar Besim Kelmendi, që tash e një kohë të gjatë është ushtrues i detyrës së Kryeprokurorit.

Kelmendi këtë ankesë e bëri sot gjatë pjesëmarrjes në Konferencën e Këshillit Gjyqësor të Kosovës, “Ditët e Gjyqësorit”.

“Gjatë fjalës së tij, U.D. Kryeprokurori Kelmendi ka përmendur sfidat e sistemit prokurorial, në veçanti ato që kanë të bëjnë me ndarjen e buxhetit nga pushteti ekzekutiv dhe legjislativ për të pasur një sistemin prokurorial funksional dhe efikas, me ç’rast ka theksuar se si pasojë e mosaprovimit të kërkesave buxhetore për të shtuar numrin e prokurorëve dhe stafit mbështetës do të vije deri te pamundësia e mbajtjes së seancave gjyqësore brenda afateve ligjore, për shkak të numrit disproporcional të prokurorëve dhe gjyqtarëve,” thuhet në njoftimin e Zyrës së Kryeprokurorit.

Sipas njoftimit, Kelmendi ka theksuar rëndësinë e koordinimit mes sistemit gjyqësor dhe sistemit prokurorial për të garantuar një drejtësi efikase dhe të besueshme në Republikën e Kosovës.

Konferenca e Këshillit Gjyqësor të Kosovës “Ditët e Gjyqësorit” është organizuar me mbështetje të Organizatës për Siguri dhe Bashkëpunim në Evropë (OSBE), Misioni në Kosovë, dhe në ditën e dytë të kësaj ngjarjeje kanë marrë pjesë gjyqtarë të fushës penale nga gjykatat e Kosovës.