Policia turke u ka hedhur gaz lotsjellës dhe plumba gome mijëra protestuesve që protestuan kundër bastisjes nga qeveria të gazetës më të madhe të vendit, Zaman.

Zyrat e gazetës “Zaman” janë bastisur të premten në mbrëmje, pasi policia ndërhyri brenda ndërtesës dhe tërhoqi nga aty shumicën e gazetarëve që ishin në redaksi, njofton The Independent.

Demonstruesit të cilët u mblodhën të shtunën jashtë redaksisë si shenjë zemërimi ndaj shtetit të cilët sipas tyre po shkelin lirinë e medieve, u përballen me gaz lotsjellës dhe plumba gome, raporton Insajderi.

Agjencia e lajmeve Reuters raporton se 2,000 njerëz ishin grumbulluar afër ndërtesës së gazetës Zaman.

Pamjet tregojnë gaz lotsjellës dhe plumba gome që iu janë shkrepur turmës, ndërsa një fotografi e shpërndarë gjerësisht në internet tregon një protestuese femër të cilës iu është mbuluar fytyra me gjak.

Anëtarët e stafit Zaman në pamundësi për të shkruar në redaksi,e kanë bërë këtë përmes Twitterit duke i quajtur këto veprime si “fundi i demokracisë” në Turqi.

“Lidhja e internetit ka shkuar. Fjalëkalimet nuk punojnë, qasja jonë në sistem është e bllokuar. Kjo është ajo që ndodh kur qeveria bllokon një gazetë”, ka shkruar Abdullah Ayasun, një nga gazetarët e gazetës Zaman.