Prokuroria Themelore në Prizren ka paraqitur kërkesë për paraburgim ndaj një zyrtari policor të identifikuar si R.P., i cili dyshohet për keqtrajtim fizik ndaj një qytetari gjatë kryerjes së detyrës zyrtare.
Ngjarja ka ndodhur më 14 qershor në rrugën “Ekrem Rexha” në Prizren.
Sipas hetimeve, R.P. dhe kolegu i tij N.B. i kishin shqiptuar gjobë qytetarit S.F. për parkim të palejuar. Ky i fundit reagoi duke hedhur gjobën në tokë dhe refuzoi të japë dokumentet e identifikimit, çka çoi në përpjekje për arrestim.
Gjatë rezistencës, policët e rrëzuan qytetarin, dhe në atë moment, R.P. dyshohet se e ka goditur disa herë në kokë, përkatësisht pranë syrit dhe veshit, duke i shkaktuar lëndime trupore.
Sipas Prokurorisë, veprimet e R.P. përbëjnë vepra penale, ndërsa një ditë më parë Inspektorati Policor njoftoi se ai është suspenduar nga detyra, shkruan Dukagjini.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
