Gjykata Themelore në Prishtinë ka marrë vendim që në cilësi të dëshmitarit për rastin e njohur si ’53 milionëshi’, ta ftojë edhe ish-Kryeministrin Ramush Haradinaj.

Këtë për Insajderin e ka konfirmuar Musa Damati, avokat i Pal Lekajt që po akuzohet në këtë rast.

“Pas shumë kërkesave, gjykata sot ka marrë vendim që ta froj në cilësi të dëshmitarit edhe ish-Kryeministrin Ramush Haradinaj”, ka thënë Damati.

Ai i ka thënë Insajderit se si mbrojtje kanë kërkuar tash e disa muaj që në këtë proces të dëshmoi Haradinaj, por ka pasur një lloj rezistencë nga ana e Prokurorisë Speciale me arsyetimin e tyre se nuk është e nevojshme dëshmia e tij, por megjithatë sot trupi gjykues i këtij rasti ka vendosur pro kërkesës së mbrojtjes.

Në rastin e njohur për publikun si 53-milionëshi akuzohen ish-ministrin Pal Lekaj dhe tre zyrtarët e tjerë Eset Berisha, Nebih Shatri dhe Besim Tahiri.

Ata po akuzohen se janë përfshirë në afera korruptive kur ishte vendosur për ndarjen e këtyre mjeteve në emër të vazhdimit të punimeve në Autostradën “Arbën Xhaferi” që lidh kryeqytetin me Hanin e Elezit.
Të mërkurën në këtë proces ka dëshmuar edhe ish-Ministri i Financave, Bedri Hamza.

Ai tha se për procedurat e pagesës dhe marrëveshjes së shumë prej 53 milionë eurove, e kishte autorizuar zëvendësministrin Fatmir Gashi dhe se vetë nuk ka qenë i përfshirë në asnjë fazë të procesit.

“E nderuar kryetare e trupit gjykues edhe para organeve kompetente kam deklaruar e sot e ripërsëris se unë nuk kam qenë pjesë e këtij procesi dhe këtë çështje e kam pas të deleguar me autorizim të veçantë tek njëri nga zëvendësministrat, në këtë rast zotëri Fatmir Gashi”, tha Hamza.