Redaksia e Gazetës Insajderi ka përcjellë me shqetësim përpjekjen e zëdhënësit të Lëvizjes Vetëvendosje për të linçuar gazetaren e Insajderit, Mira Avdimetaj.

Redaksia e Gazetes Insajderi, konfirmon se gazetarja ka kryen punën e saj profesionale duke bërë përpjekje maksimale për të konfirmuar emrat e të punësuarve në një konkurs të madh punësimi, në një institucion publik.

Shkelje etike e gazetares do të ishte nëse do të publikonte informacione, pa bërë paraprakisht verifikimin e duhur të informatave – përfshirë dërgimin e pyetjeve te palët e denoncuara në redaksinë e Gazetës Insajderi.

Redaksia e Gazetës Insajderi vlerëson se linçimet e zëdhënësit të VV-së kanë për qëllim ndjelljen e frikës te gazetarët. Kanë për qëllim frikësimin e gazetarëve për t’i raportuar skandalet e pushtetit aktual.

Gazeta Insajderi prej javës së kaluar ka publikuar hulumtime ekskluzive për punësimin e familjarëve e militantëve të Vetëvendosjes në Korporatën Energjetike të Kosovës.

Autore e artikullit ka qenë gazetarja Mira Avdimetaj.

Për këtë arsye emri i saj është targetuar për linçim nga zëdhënësi i VV-së.

Redaksia e Gazetës Insajderi siguron lexuesit se këto linçime që vinë nga zyrtarë të pushtetit nuk e frikësojnë gazetaren e as mediumin për vazhdimin dhe publikimin e hulumtimit lidhur me këto punësime.

Redaksia po ashtu i bënë thirrje Asociacionit të Gazetarëve të Kosovës, të reagojnë për këto sulme e linçime të zëdhënsit të Vetëvendosjes.