Në Qendrën Klinike Universitare të Kosovës (QKUK) po vazhdon trajtimi i tre personave që u lënduan në aksidentin në Lakrishte të Prishtinës, ku vetura ka rënë nga rrethrotullimi.

Drejtori i Klinikës Emergjente në Qendrën Klinike Universitare të Kosovës (QKUK), Naser Syla tha për Insajderin se njëri nga të lënduarit është në gjendje më të rëndë.

“Një 20 vjeçar po trajtohet në Emergjencë, gjendja e tij është më e rëndë kurse dy tjerë janë duke u trajtuar në Kirurgji Torakale”, deklaroi Syla.

“Dy prej të lënduarve janë në gjendje stabile, ndërsa njëri në gjendje të rëndë dhe është dërguar në intensiv”, ka thënë Syla për Insajderin.

Ndryshe, tre persona kanë pësuar lëndime trupore si pasojë e një aksident trafiku në Prishtinë, ku vetura ka rënë nga rrethrotullimi në lagjen Lakrishte.

Zëdhënësja e Policisë së Kosovës për Rajonin e Prishtinës, Flora Ahmeti ka konfirmuar se aksidenti ka ndodhur rreth orës 03:00.

“Sot rreth orës 03:00, në rrethrrotullimin në lagjen Lakrishte, në Prishtinë, ka ndodhur një aksident trafiku, ku është përfshirë një veturë. Si pasojë e aksidentit tre persona kanë pësuar lëndime trupore dhe të njëjtit janë dërguar për trajtimin e nevojshëm mjekësor”, deklaroi ajo.

Policia ka nisur një hetim për zbardhjen e shkaqeve të këtij vetaksidenti.