Mediat çeke kanë bërë një njoftim të rëndësishëm për transferimin e Albion Rrahmanit, sulmuesi i kërkuar nga disa skuadra në Evropë.

Shifrat dhe paraqitjet e shkëlqyera te Rapidi i Bukureshtit, pas transferimit nga FC Ballkani, e kanë vënë Albion Rrahmanin në vëmendjen e disa klubeve evropiane, mes tyre edhe Slavia Pragës.

Çekët japin informacionet e fundit për transferimin e Albion Rrahmanit. Ata pretendojnë se negociatat nuk janë shumë të avancuara dhe pengesa kryesore është çmimi i kërkuar nga Rapid, afërsisht tetë milionë euro për t’i thënë “po” lëvizjes, transmeton Gazeta Express.

Më tej, edhe Sparta Praga ka shfaqur interes për Albion Rrahmanin: “Shuma e kalon shumë buxhetin e dy skuadrave. Rapid duhet të bëjë lëshime nëse duan të arrijnë një marrëveshje për transferimin”, shkruan shtypi çek.

Megjithatë, Albion Rrahmanit nuk i mungojnë ofertat. Klubet si Aston Villa, Benfica apo Werder Bremen janë “lidhur” me emrin e tij, pasi sulmuesi kosovar ka shënuar 19 gola dhe ka dhënë pesë asistime në 30 ndeshje të luajtura në të gjitha garat gjatë sezonit me Rapidin dhe Ballkanin.

Ai vlerësohet në 3.5 milionë euro nga Transfermarkt.