Qeveria ruse ka kërkuar që të shmangen spekulimet mbi shkaqet e rrëzimit të një avioni të Azerbaijan Airlines, që çoi në humbjen e jetës së 38 personave të mërkurën në Kazakistan.

Zëdhënësi i Kremlinit, Dmitry Peskov, deklaroi se është e rëndësishme të pritet përfundimi i hetimit përpara se të nxirren përfundime. “Do të ishte gabim të parashtronim ndonjë hipotezë përpara përfundimit të hetimit,” tha ai, duke shtuar se askush nuk duhet të spekulojë për ngjarjen.

Avioni Embraer 190, i cili ishte nisur nga Baku, Azerbajxhan, me destinacion Grozny në Çeçeni, u devijua për shkak të mjegullës së dendur, sipas linjës ajrore. Pas dy tentativash të pasuksesshme për ulje në Grozny, avioni u ridrejtua drejt aeroportit Aktau në Kazakistan.

Një pasagjer i mbijetuar tha për televizionin rus se piloti tentoi uljen për herë të tretë, moment kur “diçka shpërtheu”. Pamjet nga vendngjarja tregojnë avionin duke rënë me shpejtësi dhe duke shpërthyer në flakë rreth 3 kilometra larg pistës së aeroportit në Aktau.

Ndërsa hetimet vazhdojnë, disa ekspertë të aviacionit kanë sugjeruar se avioni mund të jetë goditur aksidentalisht nga sistemet e mbrojtjes ajrore mbi Çeçeni. Nga ana tjetër, mediat pro-qeveritare në Azerbajxhan kanë raportuar pretendime se një raketë ruse mund të jetë përgjegjëse për incidentin.

Nga 67 personat që ndodheshin në bord, 29 mbijetuan. Azerbajxhani ka shpallur një ditë zie kombëtare për të nderuar viktimat e kësaj tragjedie.