Gazetari kosovar Arlind Sadiku ka reguar pas përjashtimit nga UEFA, pasi bëri shqiponjën para tifozëve serbë ditë më parë.

Sadiku ka treguar se ndeshjen mes Shqipërisë dhe Kroacisë do ta përcjell nga tribuna, por ka bërë një dedikim të gjatë për vendimin për përjashtim të tij.

Ai ka ngritur një pyetje ndaj UEFA-s, duke u thënë se në rast të ndonjë ndeshje mes Shqipërisë dhe Serbisë dhe të pranishmit në stadium do ta bëjnë shqiponjën, a do t’i përjashtojnë të gjithë.

Po ashtu, gazetari ka thënë se vendimi për përjashtim e ka gëzuar Serbinë dhe ata po e festojnë këtë vendim si një fitore të tyre.

Reagimi i plotë pa ndërhyrje:

Festa me shqiponjë asnjëherë nuk ka qenë dhe nuk do të jetë vepër kriminale!

Nuk kam ofenduar as provokuar dikë. Thjesht jam krenuar me simbolin që na përfaqëson.

Unë jam krenar që jam shqiptar dhe asnjëherë nuk frikësohem ta deklarojë këtë edhe nëse krejt bota qohet në këmbë.

Është një precedent i rrezikshëm nëse pranohet si i mirëqenë ky vendim nga shqiptarët dhe institucionet shtetërore, sepse hap një kapitull të ri.

Bëje simbolin e shqiponjës e raporto thirrjet raciste ndaj një populli të tërë – përjashtohesh, e hap rrugë për huliganët e një populli tjetër të bëjnë lirshëm thirrje fashiste.

Çka do të ndodhë pas pak kohësh kur do të organizohet evropiani mes Shqipërisë me Serbinë? Do të përjashtohen të gjithë ata që janë në detyrë dhe e ngrisin shqiponjën? Do ta pranoni këtë vendim? Ju duket i drejtë?

Fqinjët u mobilizuan dhe u alarmuan shpejtë për ta raportuar veprimin tim, sepse ndihen të rrezikuar nëse del një shqiptar dhe nuk frikësohet të thotë të vërtetën me krenari.

Ata janë gëzuar dhe e festojnë këtë ngjarje si fitore, ndërsa kushdo nga ne që i gëzohet, është prej tyre.

S’ka rëndësi a jam përjashtuar apo jo, karriera ime është shumë e vogël. Nuk është humbje e Arlind Sadikut, as e një gazetari, është humbje shtetërore e kombëtare, nëse heshtet.

Sot jam në Hamburg në përkrahje të kombëtares nga tribunat, me tifozët. Me krenari festoj përsëri me shqiponjë dhe askush nuk do mund të ma ndalojë deri në vdekje!

Forca Shqipëria 🇦🇱❤️