Driton Selmanaj, njohës i çështjeve politike dhe analist i përhershëm në emisionin Click të RTV 21, ka komentuar një përballje me presidentin Hashim Thaçi pak javë më parë, në kohën kur Thaçi insistonte për krijimin e ushtrisë përmes një ligji të veçantë.

Duke treguar atë përvojë, Selmanaj thotë se është i befasuar me gatishmërinë e Thaçit që të gënjejë se Kosova ka mbështetjen e partnerëve ndërkombëtarë për formimin e ushtrisë.

“Më befasoi se si është i gatshëm që një gënjeshtër ta shet pa asnjë fije turpi a drojë,” ka thënë Selmanaj në një intervistë për emisionin Komiteti të Gazetës Express, që transmetohet në Rtv Dukagjini.

Gjatë atij emisioni, Selmanaj dhe Thaçi kanë zhvilluar një debat të ashpër por kjo nuk e kishte penguar presidentin ta ftojë atë për një kafe më pastaj. Selmanaj thotë se e ka refuzuar ftesën.

“Në fakt, thënë sinqerisht kërkoi ai që të rrinim pak, ta pinim nga një, por jo. Unë rri me miq, e zotëri Thaçin nuk e kam mik,” ka thënë ai.