Autoritetet serbe ende i kanë kthyer përgjigje MPJD’së për të konfirmuar nëse personi i vrarë nga policia serbe është Faton Hajrizi, ashtu siç deklaruan institucionet serbe në ditën kur ndodhi vrasja e Hajrzit në Serbi.
Ministria e Punëve të Jashtme dhe Diasporës (MPJD) njoftoi se për këtë është ankuar te ambasadorët e vendeve të QUINT-it përmes Zyrës Ndërlidhëse në Serbi.
“Ministria e Punëve të Jashtme dhe Diasporës, nëpërmjet Zyrës Ndërlidhëse të Republikës së Kosovës në Serbi, ka kërkuar zyrtarisht nga autoritetet serbe konfirmimin e identitetit të personit të vrarë në Serbi. Gjithashtu, është kërkuar lehtësimi i procedurave për kthimin e trupit të pajetë në Republikën e Kosovës dhe dorëzimi i tij tek familjarët. Megjithatë, deri më tani, Zyra Ndërlidhëse e Republikës së Kosovës në Serbi nuk ka pranuar asnjë përgjigje nga autoritetet serbe,” thuhet në përgjigjen e MPJD-së për Gazetën Insajderi.
Po ashtu në përgjigjen e MPJD’së thuhet se Zyra Ndërlidhëse e Republikës së Kosovës në Serbi i ka dërguar notë sqaruese ambasadorëve të Misioneve Diplomatike të vendeve të Quint-it të akredituara në Serbi, duke theksuar faktin se përkundër kërkesës zyrtare drejtuar autoriteteve të Serbisë, ende nuk është kthyer asnjë përgjigje.
Ministria njoftoi gjithashtu se ka komunikuar me familjen e personit që raportohet si i vrarë dhe do të angazhohet gjatë gjithë procedurave deri në kthimin e trupit të viktimës në Republikën e Kosovës sa më shpejt që të jetë e mundur.
/Insajderi.org/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
