Shtetet e Bashkuara do të vendosin sanksione shtesë javën e ardhshme kundër kompanisë ushtarake private ruse “Wagner Group”, për të cilën zyrtarët amerikanë thonë se ka ndihmuar ushtrinë ruse në luftën në Ukrainë, tha Shtëpia e Bardhë të premten, raporton Reuters.

Zëdhënësi i Sigurisë Kombëtare të Shtëpisë së Bardhë, John Kirby, tha se Departamenti i Thesarit i SHBA-së do ta caktojë “Wagner”-in si një organizatë të rëndësishme kriminale transnacionale. Ai tha se ndikimi në rritje i “Wagner”-it në Rusi po shkaktonte tensione mes udhëheqjes ushtarake të vendit, raporton Reuters.

“Në koordinim me këtë përcaktim, ne do të vendosim gjithashtu sanksione shtesë javën e ardhshme kundër Wagner dhe rrjetit të tij mbështetës në shumë kontinente. Këto veprime njohin kërcënimin transkontinental që paraqet Wagner, duke përfshirë modelin e tij të vazhdueshëm të aktivitetit të rëndë kriminal”, u tha Kirby gazetarëve në konferencën e përditshme të Shtëpisë së Bardhë.

Shpallja e “Wagner”-it një organizatë kriminale transnacionale sipas urdhrit ekzekutiv të SHBA-së 13581 ngrin çdo pasuri të “Wagner”-it në SHBA dhe ndalon amerikanët të ofrojnë fonde, mallra ose shërbime për grupin.

Muajin e kaluar Shtëpia e Bardhë tha se Grupi Wagner kishte marrë një dërgesë armësh nga Koreja e Veriut për të ndihmuar në fuqizimin e forcave ruse në Ukrainë, në një shenjë të rolit në zgjerim të grupit në atë konflikt.

Ministria e Jashtme e Koresë së Veriut e kishte quajtur raportin të pabazë dhe denoncoi Shtetet e Bashkuara për ofrimin e armëve vdekjeprurëse për Ukrainën. Pronari i Wagner, Yevgeny Prigozhin muajin e kaluar mohoi të kishte marrë armë nga Koreja e Veriut dhe e karakterizoi raportin si “thashetheme dhe spekulime”.

Shtëpia e Bardhë bëri publike të premten një imazh të datës 18 nëntor që tregonte makina hekurudhore ruse që udhëtonin midis Rusisë dhe Koresë së Veriut.

Kirby tha se Koreja e Veriut dërgoi raketa këmbësorie dhe të tjera në Rusi për t’u përdorur nga Wagner dhe se imazhet tregonin pesë vagonë hekurudhorë rusë që udhëtonin nga Rusia në Korenë e Veriut. “Më 19 nëntor, Koreja e Veriut ngarkoi hekurudhat me kontejnerë transporti dhe treni u kthye në Rusi”, tha ai.

“Ndërsa vlerësojmë se sasia e materialit të dorëzuar Wagner-it nuk ka ndryshuar dinamikën e fushëbetejës në Ukrainë, ne presim që ajo të vazhdojë të marrë sistemet e armëve të Koresë së Veriut”, tha ai.

Kirby tha se presidenti rus Vladimir Putin i është drejtuar gjithnjë e më shumë Wagnerit për mbështetje ushtarake, duke shkaktuar disa tensione në Moskë.

Ai tha se Shtetet e Bashkuara vlerësojnë se Wagner aktualisht ka rreth 50,000 personel të dislokuar në Ukrainë, duke përfshirë 10,000 kontraktorë dhe 40,000 të dënuar të rekrutuar nga burgjet ruse.