Edhe pse u premtuan dhe disa herë u përdorën si mjet nga qeveritarët për të dëshmuar se projekti “Shkupi 2014” nuk ishte vetëm me frymë maqedonase, përmendoret e shumëpritura shqiptare ende nuk janë askund.

Nga Komuna Qendër thonë se përmendore të personaliteteve shqiptare nuk kanë.

“Përmendore të personaliteteve shqiptare nuk kemi. E vërtetë që ne si komunë duhet të përpunojmë procedurën. Realizimi është në proces e sipër. Unë kam biseduar me disa faktorë nga pala tjetër dhe nga ‘Beton’ duhet të bëhet piedestal. Tani më kam deklaruar që nuk do të ndaloj këtë dhe me qëllim gjatë zgjedhjeve lokale vetëm përmendoret e personaliteteve shqiptare janë lënë, por unë në këto provokime nuk bie”, tha Andrej Zhernovski, kryetar i Komunës Qendër.

Gjithashtu për të njejtën gjë u kontaktua edhe paria shqiptare në pushtet, BDI, nga e cila po ashtu nuk morëm përgjigje se kur do të vendosen përmendoret e personaliteteve shqiptare të cilat u premtuan po nga kjo parti, njofton portalb.mk

Përderisa përmendoret maqedonase dita ditës shtohen, kohë më parë këshilltari i BDI-së në Qytetin e Shkupit Qemal Musliu akuzoi kolegët e tij të PDSH-së, se vendimi i tyre për të braktisur seancën është arsyeja e miratimit të vendimit për vendosjen e këtyre 5 përmendoreve të tjera maqedonase në qendër të Shkupit.

Ndërkohë këshilltari i PDSH-së Idriz Orana thotë se ata ishin kundër rendit të ditës ku ishte vendosur pika për përmendoret, ndërsa akuzuan BDI-në, se ishte ajo që e votoi në bashkëpunim me VMRO DPMNE-në rendin e ditës.

Ndryshe, në vitin 2011 u premtua se në qendër të Shkupit do të vendosen tre përmendoret shqiptare, ajo e Josif Bagerit, Nexhat Agollit dhe Pjetër Bogdanit.