Shtëpia e Bardhë tha se presidenti Donald Trump i ka kërkuar këshilltarit për siguri kombëtare, Michael Flynn, të japë dorëheqje, “për shkak të nivelit shkatërrues të besimit” që lidhet me bisedat e tij telefonike me ambasadorin rus në Uashington dhe se situata nuk është “çështje ligjore”.

Zëdhënësi i Shtëpisë së Bardhë, Sean Spicer, i bëri këto komente një ditë pasi Flynn ka dhënë dorëheqje, pas akuzave se ai ka keqinformuar zyrtarët e administratës Trump në lidhje me bisedat me ambasadorin Sergei Kislyak, të bëra në dhjetor.

Në atë kohë, presidenti i atëhershëm i SHBA-së, Barack Obama, ka qenë duke përgatitur sanksione të reja kundër Moskës, për shkak të ndërhyrjes së dyshuar të Rusisë në zgjedhjet presidenciale në SHBA.

Flynn fillimisht i ka thënë nënpresidentit Mike Pence se ai nuk i ka diskutuar sanksionet me Kislyakun.

Por, në letrën e dorëheqjes, Flynn ka thënë se i ka dhënë nënpresidentit Pence dhe të tjerëve “informacione jo të plota” në lidhje me bisedat telefonike.

Spicer u tha gazetarëve të martën se Trump e ka shqyrtuar situatën e Flynnit për disa javë dhe pastaj ka kërkuar dorëheqjen e tij për shkak të “çështjeve të besimit”. /rel