Ish-polici Aleksandër Vlajiq, i arrestuar për spiunazh është sjellë të premten në Gjykatën Themelore në Prishtinë.

Ndaj të njëjtit, tanimë nga ana e Prokurorisë është bërë kërkesa për paraburgim.

Për rastin, pritet të mbahet seanca dëgjimore, raporton Dukagjini.

Rikujtojmë se nën dyshimin për spinuazh policia e ka arrestuar me 26 qershor ish-policin e Kosovës, Aleksander Vlajiq në regjionin e Mitrovicës.

Ai është kapur pas informacioneve që kanë qenë rrugë operative të cilat i ka siguruar Agjencia e Kosovës për Inteligjencë.

Arrestimi i të dyshuarit ka ndodhur të mërkurën mbrëma pas hetimeve disamujore nëpërmjet AKI-së dhe Policisë së Kosovës, raporton Insajderi.

Këtë e ka bërë të ditur edhe Prokuroria Speciale e cila ishte në bashkëpunim me AKI-në e policinë.

“Prokuroria Speciale e Republikës së Kosovës, pas zhvillimit të hetimeve disa mujore në bashkëpunim me Agjencinë e Kosovës për Inteligjencë dhe Policinë e Kosovës – Drejtorinë Kundër Terrorizmit sot në mbrëmje, në regjionin e Mitrovicës  ka arrestuar një person. I arrestuari A.V. dyshohet për kryerjen e veprës penale “Spiunazhi”, nga neni 124 të KPRK-së”, thuhet në njoftim.