Skitarja franceze Margot Simond ka ndërruar jetë në moshën 18-vjeçare pas një aksidenti gjatë stërvitjes në Val d’Isère ditën e enjte.
Adoleshentja ishte duke u përgatitur për një garë të Red Bull në disiplinën alpine që do të mbahej këtë fundjavë në Francë, kur pësoi një rrëzim të rëndë.
Një mjek u përpoq ta reanimonte Simond, por fatkeqësisht nuk mundi ta rikthente në jetë.
Detajet e plota rreth vdekjes së Simond ende nuk janë bërë të ditura.
Simond, e cila në muajin mars u shpall kampione në disiplinën slalom për grupmoshën U18, konsiderohej si një nga shpresat më të mëdha në skitarinë franceze për moshatarët e saj.
Federata Franceze e Skive deklaroi se komuniteti i skitarisë është “thellësisht i prekur dhe i pikëlluar nga ndarja e Margot-së”.
“Shprehim ngushëllimet tona më të sinqerta për familjen dhe të dashurit e saj, dhe u ofrojmë mbështetjen tonë të plotë në këto momente tepër të vështira,” thuhet në deklaratë.
Federata Ndërkombëtare e Skive dhe Snowboardit (FIS) e përshkroi Simond si “një sportiste të re me shumë premtime”.
Ajo shtoi: “FIS i shpreh ngushëllimet më të thella familjes së Margot dhe të afërmve të saj, dhe u ofron mbështetjen e saj të plotë në këtë kohë jashtëzakonisht të vështirë.”
Komiteti Olimpik Francez gjithashtu shprehu ngushëllime për humbjen e “një talente premtuese të skive alpine” dhe “një atleteje të re dhe të talentuar”.
Si pasojë e kësaj tragjedie, eventi i Red Bull në skitë alpine i planifikuar për këtë fundjavë është anuluar.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
