Të shtunën duke filluar nga ora 12, në Pejë do të mbahet protesta e parë kundër marrëveshjes se demarkacionit që kur Qeveria e Kosovës njoftoi se ka vendosur që më 1 shtator ta dërgojë atë për ratifikim.
Pjesëmarrjen në protestë e kanë paralajmëruar edhe partitë opozitare – Lëvizja Vetëvendosje, Aleanca për Ardhmërinë e Kosovës dhe Nisma, si dhe organizata të shoqërisë civile.
Është bërë e ditur se në protestën kundërshtuese në Komunën e Pejës, do të janë gjitha komunitetet përreth, përfshirë komunat që sipas organizatorëve cenohen nga vija kufitare me Malin e Zi.
Një protestë tjetër është paralajmëruar për 1 shtator nga Vetëvendosje, në ditën kur pritet të votohet marrëveshja me Malin e Zi, e nënshkruar në gusht të vitit të kaluar.
Përfaqësues të Vetëvendosje në disa raste kanë thënë se do të bëjnë çmos që të parandalojnë ratifikimin e kësaj marrëveshje të cilën e konsiderojnë si të dëmshme për vendin. Në anën tjetër, AAK si partia e dytë më madhe opozitare ka thënë se do të tentojë që këtë marrëveshje ta pengojë përmes votës në Kuvend.
Që nga koha kur është nënshkruar kjo marrëveshje për shënjimin e kufirit me Malin e Zi dhe marrëveshja për krijimin e Asociacionit me Serbinë, partitë opozitare kanë organizuar një numër protestash.
Në fillim të muajit gusht, ekspertë që përfaqësojnë qëndrimin e opozitës dhe ekspertët e Komisionit Qeveritar për shënjimin e vijës kufitare u ulen në një tryezë për të gjetur zgjidhje, por në të cilën vetëm u rikonfirmuan qëndrimet e njohura tash e disa muaj. Përfaqësues të partive në pushtet kanë thënë se opozita ka krijuar kauzë fiktive lidhur me demarkacionin/Insajderi.com
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
