Sot duke filluar nga ora 10, iniciativa Ta Pastrojmë Kosovën do të fillojë aksion të madh të pastrimit në 30 komuna të Kosovës.

Hapja zyrtare e aksionit do të bëhet në komunën e Prishtinës, duke filluar prej orës 10:00, tek shtëpia e shëndetit në lagjen Kalabria, ndërsa nisja e vullnetarëve për këtë pikë bëhet në ora 09:30 nga sheshi “Zahir Pajaziti”.

Përmes një komunikate për media, kjo iniciativë ka ftuar të gjithë qytetarët që t’I bashkohen këtij aksioni.

“Iniciativës do t’i bashkohen zyrtarë komunalë, pjesëtarë të Forcës së Sigurisë së Kosovës, ndërmarrjet regjionale të pastrimit të mbeturinave, kompani të ndryshme private, përfaqësues dhe vullnetarë të organizatave të ndryshme që operojnë nëpër komuna, nxënësit e shkollave fillore dhe të mesme. Bazuar në të dhënat nga aktivitetet e zhvilluara në kuadër të fushatës “Ta Pastrojmë Kosovën”, aksionit të së nesërmes do t’i përgjigjen mbi 50 mijë vullnetarë”, thuhet në një njoftim për media.

“Ju bëjmë me dije se nxënësit e secilës shkollë në Kosovë do të pastrojnë hapësirat përreth objekteve të tyre, dhe në shumicën e shkollave në Kosovë, në orën e parë do të ligjërohet për mbrojtjen e mjedisit”.

Një aksion I tillë është duke u realizuar tash e disa vite në Kosovë./Insajderi.com