Prokuroria Speciale e Kosovës ka paraqitur kërkesë për caktimin e paraburgimit ndaj të pandehurit Aleksandar Vllajiq.

Personi në fjalë është arrestuar mbrëmë dhe është Aleksandar Vllajiq, i cili kishte qenë polic i Kosovës.

Siç raporton Dukagjini nga burimet brenda organeve të sigurisë, Aleksandër Vlajiq ishte hagjent rezident i BIA-s, që e spiunonte Kosovën.

Aleksandër Vlajiq, shtetas serb i Kosovës, nuk është thjesht një i arrestuar për spiunazh në Kosovë.

Veprimtarinë e tij kundër shtetit të Kosovës arriti ta zbulojë Agjencia e Kosovës për Inteligjencë (AKI).

Këto informata bën që veprimtaria e Vlajiq të demaskohet tërësisht.

Vlajiq, në mes akteve që ka kryer në Kosovë, gjithashtu ka filmuar fshehurazi lëvizjet dhe automjetet e Policisë së Kosovës, misionit të KFOR-it dhe ndërkombëtarëve, gjithmonë në dobi të shërbimit serb BIA.

Ai në të kaluarën ishte pjesë e MUP-it serb, ndërsa kur ishte integruar në institucionet e Kosovës mbante një post të rëndësishëm në Institucionin e Policisë, duke punuar në njësinë e inteligjencës rajonale të policisë në Mitrovicë të Veriut. Sa mbante këtë pozitë ai ishte angazhuar në mbledhje të informacioneve për personat të cilët kanë qenë predikues të fesë islame.

Vlen të theksohet se informatat që rezultuan me identifikimin dhe kapjen e tij u dhanë nga Agjencia e Kosovës për Inteligjencë (AKI).

Një ndër aktet dëmtuese për Kosovën që i njëjti e ka bërë është edhe dërgimi tek BIA i emrit të një zyrtari të AKI-së, të cilin e ka mësuar gjatë takimeve zyrtare derisa ka qenë pjesëtar i Policisë së Kosovës.

Në bashkëpunim me BIA, Vlajiq ka falsifikuar dokumentacione të ndryshme, me qëllim të diskreditimit të figurave të ndryshme në Policinë e Kosovës.

Vlajiq është bërë shkak që nga informatat e tij te BIA serbe- qytetarët serbë të veriut të bëhen cak i linçimit në rrjete sociale dhe media serbe si tradhtarë.

Gjatë dorëheqjes masive të ish-zyrtarëve të Policisë së Kosovës e të cilët pastaj kishin nënshkruar kontrata me Qeverinë e Serbisë, Vlajiq ishte bashkuar në radhët e tyre.

Aleksandër Vlajiq ka qenë i punësuar në Policinë e Serbisë edhe në kohën e pushtimit. Ai i ka mbijetuar një bombardimi të NATO-s, më 2 maj 1999, kur ishte goditur ndërtesa e MUP-it okupator serb në Mitrovicë.

Saktësisht, me emër dhe mbiemër, Vlajiq i raportonte Ratko Gajtanoviçit.

Aktualisht ai mban pozitën e shefit të qendrës së BIA-s në Novi Pazar. Ka të dhëna se edhe personalisht ka qenë i pranishëm në Kosovë. Një ndër rastet, është kur kishte hyrë ilegalisht në Kosovë, me rastin e vizitës së Aleksandër Vuçiqit në Kosovë, më 8 dhe 9 maj 2018.