Publicisti Veton Surroi nëpërmes një postimi në Facebook, ka kritikuar një nismë të Ministrisë së Drejtësisë lidhur me një nen kundër shpifjes që do të jetë pjesë e Kodit të ri penal.

Me këtë nen sipas Surroit, synohet që ata që dalin haptazi kundër simboleve apo Republikës së Kosovës, duhet të dënohen dëri në 3 vjet burgim.

“Ministria e Drejtësisë përgatitka një kod të ri penal me të cilin sërish mund ta rikthejë deliktin verbal. Në ish Jugosllavi ishte neni famëkeq 133 , e Ministria e Drejtësisë e paska bërë 134. Në të , në pikën c shkruhet kështu: Kushdo që publikisht, në një takim, ose nëpërmjet shpërndarjes së materialeve të shkruara:

1.1. fyen apo me keqdashje shpreh përbuzje ndaj Republikës se Kosovës ose ndaj rendit të saj kushtetues; ose

1.2. fyen ngjyrat, flamurin, stemën apo himnin e Republikës se Kosovës dënohet me burgim deri në tre (3) vjet ose me gjobë”.

Sipas Surroit, fyerja dhe përbuzja me keqdashje, me këtë nen mbetet si çështje e interpretimit të lirë të gjykatësve.

“Ajo çka mund të jetë fyerje a përbuzje për dikë nuk është për dikë tjetër; por këtë tashmë do ta përcaktojë gjykatësi sipas shijes së vet”.

Surroi pyet se si do të vlerësohe, kundërshtimi i tij publik kundër flamurit të Kosovës.

“Sa për informim paraprak të Ministrisë së Drejtësisë, konsideroj dhe kam shkruar se flamuri i Kosovës më shumë i ka hije një peshqiri të hoteleve turke (me gjashtë yje) se sa përfaqësimit të këtij vendi. Të njëjtën gjë jam i gatshëm ta përsëris edhe nëse aprovohet ky ligj”, shkruan Surroi. /Insajderi.com