Shefi i grupit parlamentar të Partisë Demokratike të Kosovës, Abelard Tahiri ka akuzuar kryeministrin Kurti se po funksionon në sinkoronizim me presidentin e Serbisë, Aleksander Vuciq, shkruan Insajderi.

Tahiri në Kuvendin e Kosovës, pas fjalimit të Kurtit se pranon Asociacionin me 6 kushte të parashtruara, është shprehur se në kohën kur Kurti po raporton në Kuvend, të njëjtën gjë po e bën Vuçiqi në Kuvendin e Serbisë.

“Nuk e di a është rastësi apo e sinkronizuar midis presidentit Vuçiq dhe kryeministrit Kurti, mirëpo në media raportohet që ai është duke e mbajtur një seancë për Kosovën në Parlamentin e Serbisë. Në të njëjtën kohë, kryeministri sot na jep një lajm që Kosovën e fut në një drejtim të ri”, tha Tahiri.

Ai i ka cilësuar si ndryshime drastike qëndrimeve e Kurtit për Asociacionin.

“Qeveria Kurti do ta themelojë Asociacionin e komunave me shumicë serbe në vendin tonë. Pra, ky moment, kjo ditë, duket të jetë një koordinim i mirë mes dy liderëve, pra mes kryeministrit tonë dhe presidentit serb, të cilët në të njëjtën ditë, në të njëjtin moment janë duke dhënë këto lajme”, tha ai.

Ndërkohë, kryeministri Kurti u shpreh se “Zajednica nuk kalon”.

“Unë e kam të qartë që ju keni qejf me ua themelu Zajednicën, por Zajednica nuk kalon”, tha ai.