Adoleshenti i Liverpool-it, Rio Ngumoha, ka firmosur kontratën e tij të parë profesionale me kampionët e Premierligës.
Ngumoha, 17 vjeç, shënoi golin e fitores në minutën e 100-të ndaj Newcastle në debutimin e tij në Premier Ligë muajin e kaluar.
Liverpool nuk ka konfirmuar kohëzgjatjen e marrëveshjes së re të sulmuesit.
Ai u largua nga akademia e Chelseat për t’iu bashkuar “The Reds” në shtator 2024 dhe deri më tani ka zhvilluar pesë paraqitje me ekipin e parë.
Në janar, Ngumoha u bë lojtari më i ri që ka nisur një ndeshje titullar për Liverpool-in – në moshën 16 vjeç e 135 ditë – në fitoren 4-0 ndaj Accrington në FA Cup.
Ai gjithashtu debutoi në Ligën e Kampionëve këtë muaj, kur Liverpool mposhti Atletico Madridin në Anfield.
Ngumoha ka përfaqësuar Anglinë në nivele të ndryshme të të rinjve dhe debutoi me kombëtaren U-19 më 3 shtator.
I konsideruar si lojtari më i mirë i gjeneratës së tij te Chelsea, ai vendosi të kalonte te Liverpool, duke besuar se aty kishte një rrugë më të mirë për të arritur në ekipin e parë. Kjo ndodhi pavarësisht përpjekjeve të Chelseat për ta bindur, duke i ofruar disa kontrata të rëndësishme për të ardhmen.
Trajneri i Liverpool-it, Arne Slot, e përfshiu Ngumohan në ekipin e parë gjatë përgatitjeve verore, duke e aktivizuar nga minuta e parë ndaj Athletic Club në gusht. Duke luajtur nga krahu i majtë, ai shënoi pas vetëm dy minutash lojë dhe u zëvendësua në mesin e pjesës së dytë mes duartrokitjeve të gjata të tifozëve.
Kjo paraqitje erdhi pas një asistimi ndaj AC Milan dhe një goli kundër Yokohama F. Marinos në miqësoret e zhvilluara në Azi.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
