"Tentoi ta shpëtonte të birin nga mbytja, por nuk dinte not" - mediat kanadeze shkruajnë për tragjedinë ku mbeti e vdekur 34 vjeçarja nga Kosova me djalin e saj

Lajme

“Tentoi ta shpëtonte të birin nga mbytja, por nuk dinte not” – mediat kanadeze shkruajnë për tragjedinë ku mbeti e vdekur 34 vjeçarja nga Kosova me djalin e saj

Insajderi

12 June 2025 - 22:57

Klikoni Këtu për t'u bërë pjesë e kanalit të Insajderit në Youtube.

Një ngjarje tragjike ka tronditur lagjen Lachine të Montrealit, ku një grua 34-vjeçare dhe djali i saj trevjeçar humbën jetën pas mbytjes në një pishinë rezidenciale mbrëmjen e së martës.

Viktimat janë nga Kosova, komuna e Deçanit; Viktimat janë Elzina Halit Ramosaj dhe djali i saj i mitur, Eloni, shkruan Insajderi.

Lidhur me rastin tragjik kanë raportuar mediat atje.

Autoritetet morën një telefonatë urgjente në numrin 911 rreth orës 21:35, për një incident në rrugën 20e Avenue, afër Provost Street.

Sipas zëdhënëses së policisë së Montrealit, Caroline Chèvrefils,

“Ekipet e ndihmës së parë gjetën dy persona pa shenja jete. Paramedikët u përpoqën të kryenin reanimim kardiopulmonar, por për fat të keq, të dy u shpallën të vdekur në vendngjarje.”

Hetimet paraprake kanë përjashtuar çdo element kriminal. “Bëhet fjalë për një aksident tragjik,” tha Chèvrefils.

Sipas burimeve për CTV News, dyshohet se djali ka rënë fillimisht në pishinë, ndërsa nëna është hedhur për ta shpëtuar, por ajo nuk dinte not.

Dosja e rastit i është dorëzuar zyrës së mjekësisë ligjore për hetime të mëtejshme.

Ngjarja ka tronditur të gjithë banorët e lagjes.

Sipas dëshmitarëve, nëna dhe djali i vogël ishin parë së fundmi duke marrë pjesë në një paradë festive.

“Jam i traumatizuar. Është e pabesueshme që ndodhin gjëra të tilla,” tha banori Mike Mymryk.

Carol dhe Derrick Majeur, fqinjë të familjes, u shprehën thellësisht të pikëlluar: “Si do të ndihesha po të ishte një nga nipërit e mi? Do të isha jashtëzakonisht i mërzitur. Mund të imagjinoj si ndihet familja tani,” tha Carol.

Kryetarja e Lachine, Maja Vodanovic, reagoi në rrjete sociale, duke e quajtur ngjarjen “makthin më të keq të mundshëm”. Sipas saj, gjithçka nisi nga një top që ra në pishinë, duke shkaktuar një zinxhir ngjarjesh që përfundoi me mbytjen e fëmijës dhe nënës së tij.

Një lagje e tërë është lënë në pikëllim nga kjo tragjedi, e cila thekson sërish rëndësinë e masave të sigurisë përreth pishinave, veçanërisht kur përfshihen fëmijë të vegjël.