Kur kanë mbetur edhe pak javë deri në zgjedhjen e presidentit të ri të vendit, Zëvendëskryeministri Hashim Thaçi ka folur për mbështetjen e Shteteve të Bashkuara të Amerikës, që sipas tij, do të ofrojnë në këtë proces.

Thaçi, i cili sipas marrëveshjes së koalicionit me LDK-në do të pasojë Atifete Jahjagën në krye të shtetit, ka theksuar se ShBA-të mbështesin vullnetin e qytetarëve të Kosovës për presidentin e ri, duke iu referuar kështu marrëveshjes së koalicionit qeverisës.

“Shtetet e Bashkuara të Amerikës mbështesin plotësisht procesin e zgjedhjes së presidentit të Republikës së Kosovës në një proces të rregull kushtetues dhe me transparence maksimale.  ShBA-të mbështesin vullnetin e qytetarëve të Kosovës dhe kushtetutshmërinë,” ka thënë Thaçi

Thaçi po ashtu ka theksuar se ShBA-të por edhe Brukseli e dinë saktësisht se kush janë kandidatët për këtë post.

“Por atë që mund ta konfirmoj sot, është se SHBA mbështet institucionet dhe procesin e zgjedhjes së presidentit. Ajo që gjithashtu mund të konfirmoj është se SHBA dhe Brukseli e dinë mirë kush janë kandidatë për president të Republikës së Kosovës”, ka përfunduar Thaçi.

Zgjedhjet për presidentin e Kosovës pritet të mbahen gjatë këtij muaji.  Megjithëse LDK dhe PDK kanë një marrëveshje që i mundëson Thaçit të zgjedhet president, kjo gjë nuk është ende e sigurt marrë parasysh kundërshtimin që ka në disa prej deputetëve të Lidhjes Demokratike të Kosovës./Insajderi