Presidenti i Kosovës Hashim Thaçi ka bërë edhe një herë thirrje që kuvendi i Kosovës të ratifikoj marrëveshjen me Malin e Zi për përcaktimin e vijës kufitare mes dy vendeve.

Ai përmes një statusi në Facebook ka kërkuar që kriteri i mbetur të plotësohet në ditët e ardhshme.

“Nga moszbatimi i këtij kriteri, vendimi nga Brukseli për Kosovën u shty në shtator. Nëse nuk ratifikohet tash demarkacioni, as në muajin shtator nuk do të flitet dhe as të vendoset për Kosovën”, shkruan Thaçi.

Thaçi tha se kjo çështje madhore duhet të largohet nga agjenda llogaritare e përfitimeve ditore politike.

“Demarkacioni, si kauzë, nuk ekziston. Për liberalizimin e vizave kanë kontribuar të gjithë: pozita, opozita, shoqëria civile, mediet”, shkruan Thaçi.