Presidenti i Republikës së Kosovës është takuar me zëvendëspresidentin amerikan të Shtetit, Joe Biden, gjatë vizitës së tij në ShBA.

Ai ka thënë se përkushtimi i Amerikës dhe përkushtimi personal i zv/presidentit Biden për paqen në Kosovë, në rajon dhe më gjerë mbetet i përhershëm, sepse është interes strategjik i ShBA-së.

“Prandaj, jam i sigurt se ky përkushtim do të vazhdojë edhe gjatë administratës së re. Ndërsa, zëvendëspresidenti Biden dhe gjithë familja e tij, tani dhe përgjithmonë, Kosovën duhet ta konsiderojnë si shtëpinë e tyre”, ka shkruar presidenti Thaçi në llogarinë e tij në Facebook.

Thaçi, nuk ka hezituar ta quajë Bidenin si inspirim dhe model për të.

“Në jetën time, në kohë dhe rrethana të ndryshme, kam takuar shumë liderë botërorë. Por, padyshim, zëvendëspresidenti i SHBA-së, Joe Biden, për mua mbetet inspirim dhe modeli më i përkryer”, ka thënë ai.

“Ajo çfarë e bën të veçantë zëvendëspresidentin Biden, ndër të tjera është urtësia, mençuria dhe sinqeriteti i tij. I tillë ishte dhe ka qenë në të gjitha takimet që kam pasur përgjatë gjithë këtyre viteve. I tillë ishte edhe në takimin e sotëm”, ka shtuar presidenti.

“Ndjehem njeri me fat dhe krenar që vendi im mbështetet nga njerëz të tillë të jashtëzakonshëm si zëvendëspresidenti Biden. Le të mbetet e përjetshme dhe e bekuar kjo miqësi ndërmjet Kosovës dhe Amerikës”, ka përfunduar postimin e tij presidenti Hashim Thaçi./Insajderi.com

[arve url=”https://www.youtube.com/watch?v=Pk4KkGeKCQY”/]