Gjykata Themelore në Prishtinë i ka dënuar me nga 1 mijë euro Ergim Qorolli dhe Blend Majkun për kërcënimin që i bën deputetes, Blerta Deliu-Kodra përmes rrjetit social “Facebook”, shkruan Insajderi.

Dyshja i ishin drejtuar me fjalë të rënda deputetes duke i thënë “…kisha pre për zgjalli tkisha gri”, “krejt robt ti q… ha”.

Fillimisht ndaj të njëjtëve (secilit veç e veç), gjykata shqiptoi dënim me burgim në kohëzgjatje prej 6 muajve, mirëpo me pëlqimin e tyre, dënimi me burgim është zëvendësuar në dënim me gjobë, në shumë prej 1 mijë eurove për secilin.

Sipas këtij aktgjykimi, dënimin me gjobë të akuzuarit mund ta paguajnë në afat prej një viti në gjashtë këste, përndryshe në rast të mos pagesës ky dënim përmbarohet në mënyrë të dhunshme.

Të njëjtit u obliguan që secili veç e veç të paguajnë edhe shpenzimet procedurale dhe atë shumën prej 20 euro për paushallin gjyqësor dhe 20 euro tjera në për Fondin e Kompensimit të Viktimave të Krimit.

Ndërsa, për realizimin e kërkesës pasurore juridike, pala e dëmtuar, në këtë rast deputetja Deliu-Kodra është udhëzuar në kontest juridiko civil.

Deputetja Deliu-Kodra nuk ishte e pranishme as në seancat paraprake për këtë rast, e as në shpallje të këtij aktgjykimit.

Qorolli dhe Mjaku në seancën fillestare të mbajtur më 10 shtator 2024 të njëjtit e kishin pranuar fajësinë për veprën penale që ju vihej në barrë.

Në këtë rast akuzohet edhe Mirand Terzija, mirëpo për të njëjtin gjykata në seancën e lartcekur ka veçuar procedurën penale, pasi që i njëjti ka munguar për tre herë radhazi.

Çka thuhej në aktakuzë?

Sipas aktakuzës së përpiluar më 7 shtator 2022 nga Prokuroria Themelore në Prishtinë, Ergim Qorolli, Blend Mjaku dhe Mirand Terzija po akuzoheshin/akuzohet se më 19 nëntor 2021, pas një seance të Kuvendit të Republikës së Kosovës, me dashje dhe seriozisht e kanë kanosur deputeten Blerta Deliu-Kodra.

Aktakuza thotë se kanosjen ndaj Deliu-Kodrës, të akuzuarit e kishin bërë përmes rrjetit social “Facebook”, ashtu që i akuzuari Qorolli i ishte drejtuar me fjalët: “gjakin bre ta q…, robt bre ti q…,krejt ata të gjall e ata më të afrmit ti q…, bre kën e nanës ta q…, zoti shpirtin ta marrt qysh o mas keqi bre ken e serbis ta q…”.

Ndërsa, i akuzuari Mjaku në akuzë thuhet se ishte drejtuar me fjalët: “krejt sha ki ti q…, dekmit ti kisha q.., edhe ti q., kisha pre për zgjalli tkisha gri”, kurse i akuzuari Terzija kishte shkruar fjalët: “krejt robt ti q… ha, qysh UQK terroristë ti q… gjakin e nanës ta q…k***en e dreqit, ta q… shkinën e nanës ho oj shkin ti q… tdekmit n loqk”, me çka tek tek e dëmtuara-deputetja Deliu-Kodra është shfaqur ndjenja e frikës, ankthit dhe pasigurisë për jetë, raporton Betimi për Drejtësi.

Me këto veprime Qorolli, Mjaku dhe Terzija po akuzoheshin/akuzohet se secili veç e veç kanë kryer veprën penale “Kanosje” nga neni 181, paragrafi 3 lidhur me paragrafin 1 të Kodit Penal të Republikës së Kosovës, vepër kjo e dënueshme me burgim prej gjashtë muaj deri në pesë vjet.