Avokati i familjes Dehari, Tomë Gashi, ka thënë se vazhdon të jetë i bindur që Astrit Dehari është vrarë dhe nuk ka kryer vetëvrasje ashtu siç ka konstatuar sot raporti i obduksionit.

“Është e pamundshme të kryhet vetëvrasje me ato mjetet që është kryer,” ka thënë ai.

Ai ka thënë se raporti i obduksionit mund të përmirësohet, ashtu sic sipas tij, ka ndodhur edhe në të kaluarën në Kosovë.

“Kemi raste në Kosovë e në botë, që edhe një mori provash të mëtejme mund ta shpallin rezultatin ndryshe”, ka thënë ai në emisionin Info Magazina në Klan Kosova.

“Një person i madh, në gjendje të shëndoshë mentale dhe fizike, është e paparamendueshme që t’ia bëjë këtë vetes. Hoxha ka deklaruar se në shishen që ka shkaktuar asfiksi, nuk ka pasur gjurmë të tjetër kujt pos të vetë Astritit. Por është kundër natyrës që ajo shishe të mbahet në gojë deri në vdekje”, ka shtuar ai.

Komisioni mjekësor që ka përgatitur raportin e obduksionit për vdekjen e Astrit Deharit ka konstatuar se ai ka bërë vetëvrasje.

Në raport thuhet se “vdekja e tani të ndjerit Astrit Dehari ka ardhur si pasojë e asfiksisë mekanike nga mbyllja (bllokimi) i rrugëve të sipërme të fyrmëmarrjes nga mjeti me konsistencë valide (të fortë)” dhe se kjo është vetëshkaktuar nga tashmë i ndjeri.

“Dëmtimet e përshkruara në pikën 1 dhe 2 me besueshmëri janë dëmtime të vetëshkaktuara “hezituese” të cilat kanë qenë të shoqëruara me gjakderdhje të jashtme, por të cilat nuk kanë çuar në shok hemorragjik”, thuhet në raport.

“Analizat toksikologjike të kryera deri tani, si gjatë autopsisë ashtu edhe pas asaj, rezultojnë negative për barna dhe droga”, sqaron raporti.

I ndjeri Dehari ka qenë aktivist i Lëvizjes Vetëvendosje, dhe ishte arrestuar më 30 gusht të këtij viti nën dyshimin se së bashku me aktivistë të tjerë të kësaj partie kanë sulmuar Kuvendin e Kosovës me armë.  Ai vdiq më 5 nëntor.

Lëvizja Vetëvendosje në vazhdimësi që nga koha kur u dha lajmi për vdekjen e tij ka hedhur dyshime për rrethanat që kanë shkaktuar vdekjen.