Të paktën 29 persona kanë humbur jetën në një zjarr që shpërtheu në një klub nate në Stamboll.

Klubi i mbyllur për punime rinovimi ndodhet në katin e parë të një pallati 16-katësh në lagjen Besiktas, në anën evropiane të qytetit.

Sipas mediave lokale, ka qenë një shpërthim “afër skenës” që ka shkaktuar zjarrin.

Guvernatori i Stambollit, Davut Gul, u tha gazetarëve në vendngjarje se po hetohen shkaqet e zjarrit dhe besohet se viktimat ishin persona të përfshirë në punën e rinovimit.

Pesë persona janë ndaluar dhe marrë në pyetje nga autoritetet, teksa po hetohet për shkaqet e zjarrit.

Mes të arrestuarve janë drejtues të klubit të natës dhe një përgjegjës për punimet e rinovimit.

Ministri i Drejtësisë Yilmaz Tunç theksoi se “është lëshuar një urdhër arresti për 5 të dyshuar, mes të cilëve 3 zyrtarë të klubit, drejtorin përgjegjës dhe 1 person përgjegjës për ristrukturimin”.