Guvernatorja e Karolinës së Jugut, Nikki Haleyu emërua nga presidenti i zgjedhur Donald Trump për të shërbyer si ambasadore e vendit në Kombet e Bashkuara.

44-vjeçarja, bijë imigrantësh indianë, e cila po shërben në mandatin e saj të dytë si guvernatore, nuk ka përvojë në politikën e jashtme. Ajo do të jetë zgjedhja e parë në kabinetin e zotit Trump që është grua dhe jo e bardhë.

Zonja Haley nuk e mbështeti zotin Trump gjatë procesit të zgjedhjeve paraprake që përfundoi me zgjedhjen e tij si kandidat presidencial i partisë republikane. Ajo fillimisht mbështeti senatorin e Floridas Marco Rubio, dhe më pas dha mbështetjen e saj për senatorin e Teksasit Ted Cruz.

Pak para zgjedhjeve zonja Haley tha se nuk ishte entuziaste rreth kandidatëve por tha se do të votonte për zotin Trump.

Ajo kritikoi propozimin e tij për ndalimin e myslimanëve që të hyjnë në Shtetet e Bashkuara dhe përdori platformën kombëtare të përgjigjes së partisë republikane ndaj fjalimit të presidentit Obama mbi gjendjen e vendit, për të qortuar stilin e zotit Trump duke thënë, “disa njerëz mendojnë se duhet të jesh më i zhurmshmi në dhomë për të sjell ndryshim”.

Zoti Trump e ka quajtuar zonjën Haley “të dobët për çështjen e imigracionit” dhe në mars shkroi në Twitter, “Populli i Karolinës së Jugut është i turpëruar nga Nikki Haley!”

Të dy u takuan javën e kaluar në Nju Jork. Trump ka emëruar tashmë Reince Priebus në postin e shefit të personelit të Shtëpisë së Bardhë dhe Steve Bannon si strategjist, ndërsa senatorin nga Alabama Jeff Sessions si prokuror të përgjithshëm dhe ligjvënësin Mike Pompeo si drejtues të Agjencisë Qendrore të Zbulimit, CIA./VOA