Në një takim elektoral në Palm Bic të Floridas, kandidati republikan për president Donald Trump ka dënuar faktin se pse presidenti kubanez, Raul Kastro nuk doli në aeroportin e Havanës për të pritur presidentin Obama.

“Presidenti Obama u ul në aeroportin e Havanës, dhe kreu i Kubës, i cili pati dalë atje më parë për të pritur Papën dhe zyrtarë të tjerë, nuk doli për të pritur presidentin e Shteteve të Bashkuara të Amerikës.

Sinqerisht, mendoj se Obama duhet të kishte kthyer avionin dhe të largohej që aty. Duhet ta kthente avionin dhe të thoshte “mirupafshim”, ndoshta shihemi pas disa vitesh apo pas disa dekadash”, deklaroi Trump, njofton CNSnews.

Obama është presidenti i parë amerikan që shkel në tokën kubane pas 88 vjetësh, pra që prej 1928-s, kur republikani Calvin Coolidge mori pjesë në një mbledhje rajonale në Havana. /Insajderi.com